UKULINDA KWESITHUNYWA SEVANGELI

"Lindani naMi" — ngaphandle kwanoma yimuphi umbono wangasese ongowakho, kodwa linda naMi ngokuphelele. Ezigabeni zokuqala asilindi noJesu, simlindela Yena. Asilindi naYe ngokwambulwa kweBhayibheli; ezimweni zokuphila kwethu. INkosi yethu izama ukusingenisa ekuhlanganisweni naYe eGetsemane elithile, kodwa asifuni ukuya; sithi — "Cha, Nkosi, angiyiboni incazelo yalokhu, kuyababa." Singalinda kanjani noMuntu ongenakuqondwa? Siyomqonda kanjani uJesu ngokwanele ukuba silinde naYe eGetsemane laKhe, kuyilapho singazi ngisho nokuthi ukuhlupheka kwaKhe kungokwenzani? Asazi ukuthi singalinda kanjani naYe; sijwayele kuphela umqondo wokuthi uJesu ulinda nathi.

Abafundi babemthanda uJesu Kristu kwaze kwaba sekugcineni kwamandla abo emvelo, kodwa babengakuqondi lokho Yena ayehlose ukukwenza. ENsimini yaseGetsemane balala ngenxa yosizi lwabo, futhi ekupheleni kweminyaka emithathu yokusondelana okukhulu "bonke bamshiya babaleka."

"Bonke bagcwaliswa ngoMoya oNgcwele" — kwakuyibo labo "bonke," kodwa kukhona okumangalisayo okwakwenzekile phakathi naleso sikhathi — ukufa kweNkosi yethu nokuVuka nokwenyuka; futhi uMoya oNgcwele wangena kubafundi wababusa. INkosi yethu yayithe — "Niyokwamukela amandla lapho uMoya oNgcwele esefikile phezu kwenu," futhi lokhu kwakusho ukuthi bafunda ukulinda naYe kukho konke ukuphila kwabo okwakusele.