ISAKRAMENTE LOMHLATSHELO
“Okholwa yiMi . . . ngaphakathi kuye kuyogobhoza. . . .”
NgokukaJohane 7:38
UJesu akashongo ukuthi — "okholwa yiMi uyosiqaphela isibusiso sokugcwala kukaNkulunkulu," kodwa — "okholwa yiMi konke akwamukelayo kuyophuma kuye." Imfundiso yeNkosi yethu ihlala imelene nokuzazi komuntu uqobo. Injongo yaKhe akukhona ukuthuthukiswa komuntu; injongo yaKhe ukwenza umuntu afane nse naYe, futhi isici seNdodana kaNkulunkulu ukuzichitha. Uma sikholwa kuJesu, okubalulekile akukhona esikuzuzayo, kodwa yilokho Yena akuthulula ngathi. UNkulunkulu akasenzeli ukuba sibe amagilebhisi amahle ayindilinga, kodwa ukhama ubumnandi buphume kithi. Ngokomoya, asikwazi ukukala ukuphila kwethu ngempumelelo, kodwa kuphela ngalokho uNkulunkulu akuthulula ngathi, futhi lokho asikwazi nhlobo ukukukala.
Lapho uMariya waseBethaniya ephula isitsha samafutha ayigugu wawathululela ekhanda likaJesu, kwakuyisenzo okungekho omunye owabona isidingo saso; abafundi bathi kuwukumosha. Kodwa uJesu wamncoma uMariya ngesenzo sakhe esikhulu ngokweqile sokuzinikela, futhi wathi noma kuphi lapho ivangeli laKhe lishunyayelwa khona "nalokhu akwenzile kuyokhulunywa ngakho njengesikhumbuzo sakhe." INkosi yethu igcwala injabulo enkulu lapho ibona noma ubani kithi enza lokho uMariya akwenza, engabambeleli kulokhu noma kulokhuya ukonga, kodwa ezinikele ngokuphelele kuYe. UNkulunkulu wachitha ukuphila kweNdodana yaKhe ukuze izwe lisindiswe; ingabe sikulungele ukuthulula ukuphila kwethu ngenxa yaKhe?
"Okholwa yiMi ngaphakathi kuye kuyogobhoza imifula yamanzi aphilayo" — amakhulu ezimpilo zabanye ayohlale evuselelwa. Manje sekuyisikhathi sokuphula ukuphila, ukuyeka ukulangazelela ukwaneliseka, nokukuthulula. INkosi yethu ibuza ukuthi ubani kithi oyokwenzela Yena lokhu?