UKUPHELELA
“Futhi ngizoniphumuza.”
NgokukaMathewu 11:28
Noma nini lapho okuthile kuqala ukuhlakaza ukuphila kwakho noJesu Kristu, phendukela kuYe masinyane umcele ukuba amise ukuphumula. Ungalokothi uvumele kuqhubeke noma yini edala ukungabi-nokuthula. Bheka yonke ingxenye yokuhlakazeka njengento okumelwe ulwe nayo, hhayi into okumelwe uyibekezelele. Ithi — Nkosi, bonakalisa ukuqaphela kwaKho kimi, khona ukuziqaphela kuyosuka futhi Yena abe yikho konke kukho konke. Qaphela ukuvumela ukuziqaphela kuqhubeke ngoba kancane kancane kuyovusa ukuzidabukela, futhi ukuzidabukela kungokukaSathane. Hhayi-ke, angiqondwa; yilokhu okumelwe baxolise ngakho; leli iphuzu okufanele ngempela licaciswe. Bayeke abanye, ucele iNkosi ikunike ukuqaphela uKristu futhi Yena uyokwenza uzinze kuze kube yilapho usuphelele ngokuphelele.
Ukuphila okuphelele kuwukuphila komntwana. Lapho ngiziqaphela ukuthi ngiyaqaphela, kukhona okungalungile. Ngumuntu ogulayo oqaphela ukuthi kuyini ukuba nempilo. Umntwana kaNkulunkulu akayiqapheli intando kaNkulunkulu ngoba uyintando kaNkulunkulu. Lapho kube khona ukuchezuka okuncane kakhulu entandweni kaNkulunkulu, siqala ukubuza — Iyini intando yaKho? Umntwana kaNkulunkulu akathandazeli ukuqaphela ukuthi uNkulunkulu uyawuphendula umthandazo, uqiniseke ngokuthula ukuthi uNkulunkulu uwuphendula njalo umthandazo.
Uma sizama ukunqoba ukuziqaphela nganoma iyiphi indlela yengqondo ephusile, siyokukhulisa kakhulu. UJesu uthi, "Wozani Kimi futhi ngizoniphumuza," okungukuthi, ukuqaphela uKristu kuyothatha indawo yokuziqaphela. Nomaphi lapho uJesu efika khona umisa ukuphumula, ukuphumula komsebenzi ophelele ongaziqapheli nanini.