ZONKE IZINTO EZIHLONIPHEKILE ZINZIMA
“Ngenani ngesango eliwumngcingo . . . ngokuba isango liwumngcingo, nendlela incane. . .”
NgokukaMathewu 7:13-14
Uma sizophila njengabafundi bakaJesu, kumelwe sikhumbule ukuthi zonke izinto ezihloniphekile zinzima. Ukuphila kobuKristu kunzima ngendlela ekhazimulayo, kodwa lobu bunzima abusenzi siphelelwe amandla sinikezele, busivusela ukuba sinqobe. Ingabe siyazisa kangaka insindiso emangalisayo kaJesu Kristu size sibe yikho konke okusemandleni ethu kulokho okuphakeme kakhulu kwaKhe?
UNkulunkulu usindisa abantu ngomusa waKhe wobukhosi ngomsebenzi wokubuyisana kaJesu; usebenza kithi ukuba sithande futhi senze ngokwentando yaKhe enhle; kodwa kumelwe sifeze leyo nsindiso ekuphileni kwethu okungokoqobo. Uma siqala esisekelweni sokuhlengwa kwaKhe senze lokho asiyala ngakho, sithola ukuthi singakwenza. Uma sehluleka, kungenxa yokuthi asizange sizilolonge. Isikhathi esibucayi siyoveza ukuthi besizilolonga yini noma cha. Uma silalela uMoya kaNkulunkulu futhi sizilolonga ekuphileni kwethu ngokwenyama ukwenza lokho uNkulunkulu akufake kithi ngoMoya waKhe, khona-ke lapho kufika isikhathi esibucayi, siyothola ukuthi imvelo yethu uqobo kanye nomusa kaNkulunkulu kuyosisekela.
Makabongwe uNkulunkulu ngokuthi usinika izinto ezinzima ukuba sizenze! Insindiso yaKhe iyinto ejabulisayo, kodwa futhi iyinto yobuqhawe, engcwele. Isivivinya ngakho konke esiyikho. UJesu uletha "amadodana" amaningi enkazimulweni, futhi uNkulunkulu ngeke asivikele ezimfunekweni zokuba yindodana. Umusa kaNkulunkulu uveza amadoda nabesifazane abafana kakhulu noJesu Kristu njengabomndeni waKhe, hhayi abantu abantekenteke. Kudingeka ukuqeqeshwa okukhulu kakhulu ukuze uphile ukuphila okuhloniphekile komfundi kaJesu ezimweni ezingokoqobo. Kuhlale kudingekile ukwenza umzamo wokuba ohloniphekile.