UMBONO NOKWANGEMPELA
“Futhi umhlabathi owomile uyoba ichibi.”
U-Izaya 35:7
Sihlala sithola imibono, ngaphambi kokuba into yenziwe ibe ngokoqobo. Lapho siqaphela ukuthi nakuba umbono ungowangempela, awukabi ngokoqobo kithi, kungaleso sikhathi lapho uSathane eza nezilingo zakhe, futhi sithambekele ekutheni akusizi ukuqhubeka. Esikhundleni sokuba umbono ube ngokoqobo, sekufike isigodi sokuthotshiswa.
"Ukuphila akufani nensimbi eluhlaza engenzi lutho, Kodwa kuyinsimbi embiwa ebumnyameni obujulile, Futhi ekhandwa yizibhaxu zesiphetho
Ukuze ibunjwe futhi isetshenziswe." UNkulunkulu usinika umbono, abese esehlisela esigodini ukuze asikhande sibe sesimweni sombono, futhi kusesigodini lapho abaningi bethu bephelelwa amandla bahlehle khona. Yonke imibono iyokwenziwa ibe ngokoqobo uma sibekezela. Cabanga ngokungaxhamazeli okukhulu kukaNkulunkulu! Yena akalokothi ajahe. Thina sihlala sixhamazela kakhulu. Ekukhanyeni kwenkazimulo yombono siyaphuma siyokwenza izinto, kodwa umbono awukabi ngokoqobo kithi; futhi uNkulunkulu kumelwe asiyise esigodini, asidlulise emililweni nasezikhukhuleni ukuze asikhande sibe sesimweni esifanele, size sifike lapho engasethemba khona ukuba asiphathise ubuqiniso bangempela. Kusukela sathola umbono uNkulunkulu ubelokhu esebenza, esibumba sibe sesimweni sesibonelo esiphakeme, kodwa siphunyuka kaninginingi esandleni saKhe bese sizama ukuzikhandela isimo esithandwa yithi.
Umbono awuyona inqaba esemoyeni, kodwa ungumbono walokho uNkulunkulu afuna ube yikho. Mvumele akubeke esondweni laKhe lombumbi futhi akuphendukise ngendlela athanda ngayo, futhi njengoba kuqinisekile ukuthi uNkulunkulu unguNkulunkulu nokuthi wena unguwe, uyophuma usunjengombono ncamashi. Ungapheli amandla phakathi nalolu hlelo. Uma wake waba nombono kaNkulunkulu, ungazama ngokuthanda kwakho ukwaneliswa ezingeni eliphansi, kodwa uNkulunkulu akasoze akuvumela.