YINI ELANDELAYO?

Uma ungazinqamuli izintambo zokubopha umkhumbi, uNkulunkulu kuyomelwe azinqamule ngesiphepho akuthumele olwandle. Beka konke kuNkulunkulu, uphumele emanzini amakhulu akhukhumalayo enjongo yaKhe, amehlo akho ayovuleka. Uma ukholwa kuJesu, akufanele uchithe sonke isikhathi sakho emanzini abushelelezi ngaphakathi nje komgoqo wetheku, ugcwele injabulo, kodwa uhlale uboshiwe; kumelwe uphume udlule emgoqweni wetheku ungene ekujuleni okukhulu kukaNkulunkulu bese uqala ukwazi ngokwakho, uqale ukuba nokuqonda komoya.

Lapho wazi ukuthi kufanele wenze into, bese uyenza, ngokushesha wazi okwengeziwe. Buyela emuva ubone lapho usuye wasinda khona ngokomoya, uyothola ukuthi kubuyela ephuzwini lapho kwakukhona into owawazi ukuthi kufanele uyenze, kodwa wangayenza, ngoba kwakubonakala kungekho sidingo esiphuthumayo sokwenza kanjalo, futhi manje awusenakho ukubona noma ukuqonda; ngesikhathi esibucayi uhlakazeka ngokomoya esikhundleni sokuba uzibambe ngokomoya. Kuyingozi ukwenqaba ukuqhubeka nokwazi.

Umgunyathi wokulalela yisimo sengqondo ozakhela kuso amathuba okuzidela; umdlandla ubhekwa ngephutha njengokuqonda. Kulula ukuzidela kunokufeza isiphetho sakho somoya, esishiwo KwabaseRoma 12:1-2. Kungcono kakhulu ukufeza injongo kaNkulunkulu ekuphileni kwakho ngokuqonda intando yaKhe kunokwenza izenzo ezinkulu zokuzidela. "Ukulalela kungcono kunomhlatshelo." Qaphela ukubuyela kulokho owawuyikho lapho uNkulunkulu efuna ube yilokho ongakaze ube yikho. "Uma umuntu ethanda ukwenza . . . uyokwazi."