BONAKALISA NGAPHANDLE LOKHO UNKULUNKULU AKUSEBENZA NGAPHAKATHI
“Bonakalisani ngaphandle insindiso yenu.”
KwabaseFiliphi 2:12-13
Intando yakho iyavumelana noNkulunkulu, kodwa enyameni yakho kunesimo esikwenza ungabi namandla okwenza lokho okwaziyo ukuthi kufanele ukwenze. Lapho iNkosi yethulwa kunembeza, into yokuqala unembeza oyenzayo ukuvusa intando, futhi intando ihlala ivumelana noNkulunkulu. Uthi — "Kodwa angazi ukuthi intando yami iyavumelana yini noNkulunkulu." Bheka kuJesu uyothola ukuthi intando yakho nonembeza wakho kuvumelana naYe ngaso sonke isikhathi. Into ekwenza uthi "Ngeke" ayijulile njengentando yakho; iwukuphambuka, noma inkani, futhi lokhu akuvumelani nanini noNkulunkulu. Into ejulile kumuntu yintando yakhe, hhayi isono. Intando iyisici esiyisisekelo ekudaleni kukaNkulunkulu umuntu: isono yisimo esiphambukile esangena kumuntu. Kumuntu ozalwe kabusha umthombo wentando unguMninimandla onke. "Ngokuba nguNkulunkulu osebenza kini ukunikeza ukuthanda nokwenza ngokwentando yaKhe enhle." Kumelwe ubonakalise ngaphandle ngokugxila nangokucophelela lokho uNkulunkulu akusebenza ngaphakathi; hhayi ukuthi uyisebenze insindiso yakho, kodwa uyibonakalise ngaphandle, kuyilapho ugxila ngokuzimisela ngokholo olungantengantengi ekuhlengweni okuphelele kweNkosi. Lapho ukwenza lokhu, awulethi intando ephikisana nentando kaNkulunkulu, intando kaNkulunkulu iyintando yakho, nokukhetha kwakho kwemvelo kuhamba emgqeni wentando kaNkulunkulu, ukuphila kube ngokwemvelo njengokuphefumula. UNkulunkulu ungumthombo wentando yakho, ngakho uyakwazi ukubonakalisa intando yaKhe ngaphandle. Inkani 'iyisigaxa' esingenangqondo esenqaba ukukhanyiselwa; okuwukuphela kwento ukuyiqhumisa ngedayinamayithi, futhi leyo dayinamayithi ukulalela uMoya oNgcwele.
Ingabe ngiyakholwa ukuthi uNkulunkulu uMninimandla onke ungumthombo wentando yami? UNkulunkulu akagcini ngokulindela ukuba ngenze intando yaKhe, kodwa ungaphakathi kimi ukuze ayenze.