UBUNGCWELE UMA BUQHATHANISWA NOKUBA LUKHUNI KUNKULUNKULU
“Futhi Yena . . . wamangala ukuthi kwakungekho mnxuseli.”
U-Izaya 59:16
Isizathu sokuba abaningi bethu bayeke ukuthandaza babe lukhuni kuNkulunkulu ukuthi sithakaselela umthandazo ngokwemizwa kuphela. Kuzwakala kulungile ukusho ukuthi siyathandaza; sifunda izincwadi ngomthandazo ezisitshela ukuthi umthandazo uyazuzisa, ukuthi izingqondo zethu ziyathula nemiphefumulo yethu iphakanyiswe lapho sithandaza; kodwa u-Izaya usikisela ukuthi uNkulunkulu uyamangala ngemicabango enjalo ngomthandazo.
Ukukhonza nokunxusela kumelwe kuhambisane, okunye akunakwenzeka ngaphandle kokunye. Ukunxusela kusho ukuthi siyazivusa ukuze sithole umqondo kaKristu ngalowo esimthandazelayo. Kaningi esikhundleni sokukhonza uNkulunkulu, sakha izincazelo zendlela umthandazo osebenza ngayo. Ingabe siyakhonza noma siphikisana noNkulunkulu — "Angiboni ukuthi uzokwenza kanjani." Lokhu kuwuphawu oluqinisekile lokuthi asikhonzi. Lapho silahlekelwa ukubona uNkulunkulu siba lukhuni futhi sigomele. Sijikijela izicelo zethu esihlalweni sobukhosi sikaNkulunkulu bese simyalela ukuthi yini esifuna ayenze. Asimkhonzi uNkulunkulu, futhi asifuni ukwakha umqondo kaKristu. Uma silukhuni kuNkulunkulu, siyoba lukhuni nakwabanye abantu.
Ingabe simkhonza uNkulunkulu kangangokuba siyazivusa simbambe ukuze sihlanganiswe nomqondo waKhe ngalabo esibathandazelayo? Ingabe siphila ebudlelwaneni obungcwele noNkulunkulu, noma silukhuni futhi siyagomela?
"Kodwa akekho onxusela ngendlela efanele" — khona-ke yiba yilowo ngokwakho, yiba yilowo okhonza uNkulunkulu futhi ophila ebudlelwaneni obungcwele naYe. Ngena emsebenzini wangempela wokunxusela, futhi ukhumbule ukuthi kuwumsebenzi, umsebenzi ovivinya wonke amandla; kodwa umsebenzi ongenalo ugibe. Ukushumayela iVangeli kunogibe; umthandazo wokunxusela awunalo.