UKUNGABAZA UJESU OKUVELA EKUZIZWENI SIPHANSI
“Mnumzane, awunalutho lokukha ngalo.”
NgokukaJohane 4:11
"Ngihlatshwa umxhwele yisimangaliso salokho uNkulunkulu akushoyo, kodwa angeke ngempela alindele ukuba ngikuphile kuze kufike emininingwaneni yokuphila kwami!" Uma sekufanele sibhekane noJesu Kristu ngokwalokho Yena ayikho, isimo sethu esokuzibona siphakeme ngokwenkolo — Imigomo yaKho iphakeme futhi iyasihlaba umxhwele, kodwa lapho sibhekana nezinto ezingokoqobo, ayinakwenziwa. Ngamunye wethu ucabanga ngale ndlela ngoJesu ngokuqondene nokuthile. Lokhu kungabaza ngoJesu kuqala ngemibuzo yokuhlekisa esibuzwa yona lapho sikhuluma ngezivumelwano zethu noNkulunkulu — Uzoyithathaphi imali? Uzonakekelwa kanjani? Noma kuqala kithi lapho sitshela uJesu ukuthi isimo sethu sinzima ngokwedlulele kuYe. Kuhle impela ukusho ukuthi "Thembela eNkosini," kodwa umuntu kufanele aphile, kanti uJesu akanalutho lokukha ngalo — akukho angasinika ngakho lezi zinto. Qaphela inkohliso yokuzishaya ongcwele kuwe ethi — Angingabazi uJesu, ngingabaza mina kuphela. Akekho kithi owake wazingabaza; sazi ncamashi lokho esingeke sikwazi ukukwenza, kodwa siyamngabaza uJesu. Kusiphatha kabi ukucabanga ukuthi Yena angenza esingakwazi ukukwenza.
Ukungabaza kwami kuvela ekutheni ngizihlola ngokuphelele ukuze ngithole ukuthi Yena uzokwazi kanjani ukukwenza. Imibuzo yami iphuma ekujuleni kokuzizwa kwami ngiphansi. Uma ngikubona lokhu kungabaza kimi, mangikuveze ekukhanyeni ngikuvume — "Nkosi, bengikungabaza Wena, angikholwanga ukuthi ukuhlakanipha kwaKho kudlula okwami; angikholwanga emandleni aKho onke ngale kokuqonda kwami okulinganiselwe ngawo."