IREO LALANA MARINA HANAOVANA NY ASA
“Ary Izaho, raha asandratra, dia hitaona ny olona rehetra hanatona Ahy.”
Jaona 12:32
Vitsy dia vitsy amintsika no mahatakatra ny antony nahafatesan’i Jesosy Kristy. Raha fangorahana ihany no ilain’ny olombelona, dia vazivazy ny Hazofijalian’i Kristy, tsy nilaina izany. Tsy "fitiavana kely," fa fandidiana no ilain’izao tontolo izao.
Rehefa mifanatrika amin’ny fanahy iray sahirana ara-panahy ianao, dia ampahatsiahivo ny tenanao an’i Jesosy Kristy teo amin’ny Hazofijaliana. Raha afaka manatona an’Andriamanitra amin’ny lalana hafa io fanahy io, dia tsy ilaina ny Hazofijalian’i Jesosy Kristy. Raha afaka manampy ny hafa amin’ny fangorahanao na ny fahatakaranao ianao, dia mpamadika an’i Jesosy Kristy. Tsy maintsy mihazona ny fanahinao hifandray araka ny tokony ho izy amin’Andriamanitra ianao ary mandrotsaka ny tenanao ho an’ny hafa eo amin’ny lalany, fa tsy mandrotsaka izany eo amin’ny lalan’olombelona ka tsy miraharaha an’Andriamanitra. Ny hafatra lehibe ankehitriny dia fivavahana mahafinaritra ivelany.
Ny zavatra tokana tsy maintsy ataontsika dia ny mampiseho an’i Jesosy Kristy nohomboana tamin’ny hazofijaliana, ka manandratra Azy mandrakariva. Hampivily lalana ny fampianarana rehetra izay tsy miorim-paka ao amin’ny Hazofijalian’i Jesosy. Raha mino an’i Jesosy Kristy ilay mpiasa ary miantehitra amin’ny Zava-misin’ny Fanavotana, dia tsy maintsy ho voakasika ireo olona iresahany. Ny fifandraisana tsotran’ilay mpiasa amin’i Jesosy Kristy no zavatra mitoetra sy mihalalina; miankina amin’izany sy izany irery ny maha-ilain’Andriamanitra azy.
Ny antson’ny mpiasan’ny Testamenta Vaovao dia ny hampiharihary ny ota sy haneho an’i Jesosy Kristy ho Mpamonjy, noho izany dia tsy afaka mampiasa teny miendrika tononkalo izy, fa tsy maintsy hentitra tahaka ny mpandidy. Nirahin’Andriamanitra hanandratra an’i Jesosy Kristy isika, fa tsy hanao lahateny kanto mahatalanjona. Tsy maintsy mandinika mahitsy hatrany amin’ny halalina nandinihan’Andriamanitra antsika isika, mailo amin’ny fahatsapana ireo Soratra Masina izay mampiditra lalina ny fahamarinana ary mampihatra izany tsy amin-tahotra.