NY MAHA-VOATOKANA HO MASINA NY TOE-JAVATRA TSY VOAMARIKA
“Miara-miasa hahasoa ireo izay tia an’Andriamanitra ny zavatra rehetra.”
Romana 8:28
Andriamanitra no mandahatra ny toe-javatra eo amin’ny fiainan’ny olo-masina. Tsy misy izany kisendrasendra izany ao amin’ny fiainan’ny olo-masina. Amin’ny fitondrany Andriamanitra dia mitondra anao ao anatin’ny toe-javatra tsy azonao takarina mihitsy, nefa takatry ny Fanahin’Andriamanitra izany. Entin’Andriamanitra ho any amin’ny toerana sy eo anivon’ny olona ary ao anatin’ny toe-javatra ianao mba hahafahan’ny fanelanelanan’ny Fanahy am-bavaka ao anatinao manaraka lalana voafaritra manokana. Aza mametraka ny tananao eo anoloan’ny toe-javatra mihitsy ka manao hoe — Izaho ihany no ho mpiahy ny tenako eto, tsy maintsy mijery ity aho, ary miambina itsy. Eo an-tanan’Andriamanitra ny toe-javatrao rehetra, koa aza heverina ho hafahafa mihitsy ny toe-javatra misy anao. Ny anjaranao amin’ny fanelanelanana am-bavaka dia tsy ny miditra ao amin’ny fijaliana mafin’ny fanelanelanana am-bavaka, fa ny mampiasa ny toe-javatra araka ny saina mahazatra izay ametrahan’Andriamanitra anao, sy ny olona araka ny saina mahazatra izay ametrahan’ny fitondrany anao eo anivony, mba hitondra azy ireo eo anoloan’ny seza fiandrianan’Andriamanitra sy hanome fahafahana ny Fanahy ao anatinao hanao fanelanelanana am-bavaka ho azy ireo. Amin’izany fomba izany no handrakofan’Andriamanitra izao tontolo izao manontolo amin’ny olo-masiny.
Moa ve manasarotra ny asan’ny Fanahy Masina aho amin’ny tsy maha-voafaritra mazava ahy, na amin’ny fiezahana hanao ny asany ho Azy? Tsy maintsy manao ny lafin’olombelona amin’ny fanelanelanana am-bavaka aho, ary ny lafin’olombelona dia ny toe-javatra misy ahy sy ny olona ifandraisako. Tsy maintsy mihazona ny fiainako amim-pahatsiarovan-tena ho fitoerana masin’ny Fanahy Masina aho, ary rehefa mitondra ireo olona samihafa eo anatrehan’Andriamanitra aho, dia manao fanelanelanana am-bavaka ho azy ireo ny Fanahy Masina.
Tsy ho ahy mihitsy ny fanelanelanana am-bavaka ataonao, ary tsy ho anao mihitsy ny ahy, nefa manao fanelanelanana am-bavaka ao amin’ny fiainantsika voafaritra manokana ny Fanahy Masina, ary raha tsy misy izany fanelanelanana am-bavaka izany dia hisy olona hampahantraina.