NY FAHEFAN’NY ZAVA-MISY

Tena ilaina ny manome ny olona fahafahana hanao zavatra miorina amin’ny fahamarinan’Andriamanitra. Tsy maintsy avela amin’ilay olona manokana ny andraikitra, tsy afaka manao zavatra hisolo azy ianao, tsy maintsy asa ataony amim-piniavana izany, nefa ny hafatra ara-pilazantsara dia tokony hitarika ny olona hanao zavatra mandrakariva. Ny fahalemena tsy afa-mihetsika avy amin’ny fandavana hanao zavatra dia mamela ny olona eo amin’izay nisy azy teo aloha mihitsy; raha vao manao zavatra izy, dia tsy mitovy intsony. Ny hadalan’izany no misakana olona an-jatony izay efa nandresen’ny Fanahin’Andriamanitra lahatra. Raha vao manipy ny tenako ho ao anatin’ny asa iray aho, dia velona aho amin’io segondra io; fisiana fotsiny ny sisa rehetra. Ny fotoana tena iainako dia ny fotoana anaovako zavatra amin’ny sitrapoko manontolo.

Aza avela handalo tsy misy asa atao miorina aminy ny fahamarinan’Andriamanitra izay nampidirina lalina tao amin’ny fanahinao, tsy voatery ho ara-batana, fa ao amin’ny sitrapo. Raketo an-tsoratra izany, amin’ny ranomainty na amin’ny ra. Ny olo-masina faran’izay osa izay manao fifanarahana amin’i Jesosy Kristy dia afaka amin’ny segondra anaovany zavatra; eo anilany ny hery tsitoha rehetra an’Andriamanitra. Manatona ny fahamarinan’Andriamanitra isika, miaiky fa diso, nefa miverina indray; avy eo manatona azy indray, ary miverina; mandra-pianarantsika fa tsy manana zo hiverina isika. Tsy maintsy mamakivaky tanteraka eo amin’ny teny iray avy amin’ny Tompontsika Mpanavotra isika ka manao fifanarahana Aminy. Ny teniny hoe "manatona" dia midika hoe "manaova fifanarahana." "Mankanesa atỳ Amiko." Ny zavatra farany ataontsika dia ny manatona; nefa izay rehetra manatona dia mahalala fa amin’io segondra io ny firohotan’ny fiainan’Andriamanitra mihoatra ny voajanahary dia miditra ao aminy avy hatrany. Ny hery manjakazaka avy amin’izao tontolo izao, ny nofo ary ny devoly dia tsy afa-mihetsika, tsy noho ny asanao, fa satria nampifandray anao amin’Andriamanitra sy ny herin’ny fanavotany ny asanao.