INONA MOA NY MISIONERA?
“Tahaka ny nanirahan’ny Raiko Ahy, no anirahako anareo koa.”
Jaona 20:21
Ny misionera dia olona irahin’i Jesosy Kristy tahaka ny nanirahan’Andriamanitra Azy. Tsy ny filàn’ny olona no feo lehibe manjaka, fa ny baikon’i Jesosy. Ao aoriana ny loharanon’ny aingam-panahintsika eo amin’ny asa ho an’Andriamanitra, fa tsy eo aloha. Ny fironana ankehitriny dia ny mametraka ny aingam-panahy eo aloha, ny mamafa izay rehetra eo anoloantsika sy mamoaka izany rehetra izany hifanaraka amin’ny fiheverantsika ny fahombiazana. Ao amin’ny Testamenta Vaovao dia apetraka ao aoriantsika ny aingam-panahy, dia Jesosy Tompo. Ny idealy dia ny mahatoky Aminy, ny manatanteraka ireo tetikasa Azy.
Ny fifikirana manokana amin’i Jesosy Tompo sy ny fomba fijeriny no zavatra tokana tsy tokony hodian-tsy hita. Ao amin’ny tetikasa misionera ny loza lehibe dia ny famafan’ny filàn’ny olona ny antson’Andriamanitra mandra-panafonan’ny fiombonam-pihetseham-pon’olombelona tanteraka ny hevitry ny hoe nirahin’i Jesosy. Goavana loatra ny filàna, mampisafotofoto loatra ny toe-javatra, ka misalasala sy tsy mahomby ny herin-tsaina rehetra. Adinontsika fa ny antony lehibe iray fototry ny tetikasa misionera rehetra dia tsy ny fanandratana ny olona voalohany indrindra, na ny fanabeazana ny olona, na ny filàny; fa voalohany sy ambonin’ny rehetra ny baikon’i Jesosy Kristy — "Koa mandehana ianareo, ary ampianaro ny firenena rehetra."
Rehefa mijery ny fiainan’ireo lehilahy sy vehivavin’Andriamanitra isika dia mora milaza hoe — Fahendrena faran’izay maranitra re no nananany! Tena takany tanteraka izay rehetra irin’Andriamanitra! Ny Sain’Andriamanitra no saina maranitra ao ambadik’izany, fa tsy fahendren’olombelona velively. Omentsika voninahitra ny fahendren’olombelona nefa tokony hanome voninahitra ny fitarihan’Andriamanitra masina amin’ny alalan’ireo olona tahaka ny zaza izay adala ampy ka natoky ny fahendren’Andriamanitra sy ny fampitaovana mihoatra ny voajanahary avy amin’Andriamanitra.