TSY MISY AMIN’IZANY MIHITSY!
“Raha misy olona ao amin’i Kristy, dia olom-baovao izy: efa lasa ireo zavatra taloha.”
2Korintiana 5:17
Tsy kolokoloin’ny Tompontsika mihitsy ny fitsarana an-tendrony ananantsika, vonoiny izany, sakanany mivantana[1]. Mihevitra isika fa liana manokana amin’ireo fitsarana an-tendrony manokana ananantsika Andriamanitra; tena azontsika antoka fa tsy hitondra antsika tahaka ny tsy maintsy itondrany ny olon-kafa mihitsy Andriamanitra. "Tsy maintsy mitondra ny olon-kafa amin’ny fomba tena hentitra Andriamanitra, nefa mazava ho azy fa fantany fa mety avokoa ny fitsarana an-tendrony ananako." Tsy maintsy mianatra isika — "Tsy misy amin’izany mihitsy!" Tsy hoe miandany amin’ny fitsarana an-tendrontsika Andriamanitra, fa minia mamafa izany Izy. Ampahany amin’ny fanabeazana ara-moraly antsika ny sakanan’ny fitondrany ny fitsarana an-tendrontsika mivantana, sy ny fijerena ny fomba anaovany izany. Andriamanitra tsy manaja na inona na inona entintsika eo Aminy. Zavatra iray ihany no irin’Andriamanitra amintsika, dia ny fanolorantsika ny tenantsika tsy misy fepetra.
Rehefa ateraka indray isika, dia manomboka manatanteraka ny famoronany vaovao ao anatintsika ny Fanahy Masina, ary ho avy ny fotoana tsy hisy na dia kely aza amin’ny lamina taloha, levona ny fahamanetriketrika taloha, levona ny fihetsika tranainy manoloana ny zavatra, ary "avy amin’Andriamanitra ny zavatra rehetra." Ahoana no hahazoantsika ilay fiainana tsy misy filan-dratsy, tsy misy tombontsoan-tena, tsy mora tohina amin’ny fanindronana, ilay fitiavana tsy mora tezitra, tsy manao kajy ny ratsy, tsara fanahy mandrakariva? Ny hany lalana dia ny tsy hamelana na dia kely amin’ny fiainana taloha aza hijanona; fa ny fitokiana tsotra sy tanteraka amin’Andriamanitra ihany, fitokiana izay tsy irintsika intsony ny fitahian’Andriamanitra, fa Izy irery ihany no irintsika. Efa tonga amin’ny toerana ahafahan’Andriamanitra manaisotra ny fitahiany isika ka tsy misy fiantraikany amin’ny fitokiantsika Azy ve izany? Raha vao mahita an’Andriamanitra miasa isika, dia tsy hanelingelina ny lohantsika intsony amin’ny zavatra mitranga, satria tena matoky ny Raintsika any an-danitra Izay tsy hitan’izao tontolo izao isika.