"IZAHO TOKOA . . . NEFA IZY"

Efa tonga teo amin’ny toerana iray teo amin’ny fanandramako ve aho ka afaka milaza hoe — "Izaho tokoa — nefa Izy"? Mandra-pahatongan’izany fotoana izany, dia tsy ho fantatro velively ny dikan’ny batisan’ny Fanahy Masina. Tonga eo amin’ny fiafarako tokoa aho, tsy mahavita na inona na inona: nefa eo indrindra no anombohany — manao ireo zavatra izay tsy ho hain’olon-kafa velively Izy. Voaomana amin’ny fiaviany ve aho? Tsy afaka tonga i Jesosy raha mbola misy na inona na inona manakana Azy na hatsarana izany na faharatsiana. Rehefa tonga Izy moa ve aho voaomana hamela Azy hitarika an-keriny ho ao amin’ny mazava ny zavatra tsy mety rehetra nataoko? Eo indrindra no ahatongavany. Na aiza na aiza fantatro fa maloto aho, dia hametraka ny tongony Izy; na aiza na aiza iheverako fa madio aho, dia hanaisotra ny tongony Izy.

Tsy mitondra fahatsapana fahotana ny fibebahana, fa fahatsapana tsy fahamendrehana tsy hay lazaina. Rehefa mibebaka aho, dia tsapako fa tsy afa-manoatra tanteraka aho; fantatro hatrany anatiko fa tsy mendrika na dia hitondra ny kapany aza aho. Efa nibebaka toy izany ve aho? Sa mbola misy soso-kevitra miafina ny hiarovako ny tenako? Ny antony tsy ahafahan’Andriamanitra miditra eo amin’ny fiainako dia ny mbola tsy namakivakiako hatrany amin’ny fibebahana.

"Izy hanao batisa anareo amin’ny Fanahy Masina sy ny afo." Tsy milaza ny batisan’ny Fanahy Masina ho fanandramana i Jaona, fa ho asa ataon’i Jesosy Kristy. "Izy hanao batisa anareo." Ny hany fanandramana tsapan’izay atao batisa amin’ny Fanahy Masina dia ny fahatsapana tsy fahamendrehana tanteraka.

Izaho tokoa dia izao sy izatsy; nefa tonga Izy, ary nisy zavatra mahatalanjona nitranga. Tongava eo amin’ny sisiny izay anaovany ny zavatra rehetra.