INONA NO HITANAO AO AMIN’NY RAHONAO?
“Indro, tonga miaraka amin’ny rahona Izy.”
Apokalypsy 1:7
Mifandray amin’Andriamanitra mandrakariva ny rahona ao amin’ny Baiboly. Ny rahona dia ireo alahelo na fijaliana na fitondran’Andriamanitra, ao anatiny na ivelan’ny fiainantsika manokana, izay toa manohitra ny fanapahan’Andriamanitra. Amin’ny alalan’ireo rahona ireo indrindra no ampianaran’ny Fanahin’Andriamanitra antsika ny fandehanana amin’ny finoana. Raha tsy nisy rahona, dia tsy hanam-pinoana isika. "Vovoky ny tongotry ny Raintsika ihany ny rahona." Famantarana fa eo Izy ny rahona. Fanambarana lehibe tokoa ny mahalala fa ny alahelo sy ny famoizana havan-tiana ary ny fijaliana no rahona miaraka amin’Andriamanitra! Tsy afaka manatona tsy misy rahona Andriamanitra, tsy tonga ao anatin’ny famirapiratana mazava Izy.
Tsy marina ny milaza fa te hampianatra antsika zavatra iray ao amin’ny fitsapana Andriamanitra: amin’ny alalan’ny rahona rehetra entiny, dia tiany isika hanadino izay efa nianarana. Ny fikasany ao amin’ny rahona dia ny hanatsotra ny finoan-kevitsika mandra-pahatonga ny fifandraisantsika Aminy hitovy tanteraka amin’ny an’ny zaza — Andriamanitra sy ny fanahiko manokana, aloka ny olon-kafa. Mandra-pahatongan’ny olon-kafa ho aloka, dia ho ahy indraindray ny rahona sy ny haizina. Lasa tsotra kokoa noho izay nisy hatrizay ve ny fifandraisana eo amiko sy Andriamanitra?
Misy fifandraisana eo amin’ireo fitondran’Andriamanitra hafahafa sy izay fantatsika momba Azy, ary tsy maintsy mianatra manazava ireo zava-miafin’ny fiainana eo amin’ny fahazavan’ny fahalalantsika an’Andriamanitra isika. Raha tsy afaka mifanatrika tanteraka amin’ny zava-misy maizina indrindra, mainty indrindra isika nefa tsy manimba ny toetran’Andriamanitra, dia mbola tsy mahalala Azy.
"Natahotra izy rehefa niditra tao amin’ny rahona . . ." — Misy olona "afa-tsy Jesosy irery" ve ao amin’ny rahonao? Raha izany, dia hihamaizina izany; tsy maintsy tonga amin’ny toerana izay tsy misy "olona intsony afa-tsy Jesosy irery."