MIANKINA AMIN’NY FANATREHAN’ANDRIAMANITRA

Tsy misy fientanam-po amin’ny fandehanana; izany no fitsapana ireo toetra rehetra tsy miovaova. Ny hoe "mandeha ka tsy reraka" no fara tampony azon’ny hery tratrarina. Ampiasaina ao amin’ny Baiboly ny teny hoe "mandeha" mba hilazana ny toetra — "Nijery an’i Jesosy raha nandeha i Jaona, ka nanao hoe, Indro ny Zanak’ondrin’Andriamanitra!" Tsy misy zavatra mijanona ho hevitra ankapobeny fotsiny velively ao amin’ny Baiboly, fa velona sy tena izy foana. Tsy milaza Andriamanitra hoe — Aoka ho ara-panahy, fa — "Mandehana eo anatrehako."

Rehefa tsy salama ara-batana na ara-pihetseham-po isika, dia maniry fientanam-po mandrakariva. Eo amin’ny lafiny ara-batana izany dia hitarika amin’ny fanaovana sandoka ny Fanahy Masina; eo amin’ny fiainam-pihetseham-po dia mitarika amin’ny firaiketam-po tafahoatra sy ny fandravana ny fitondrantena; ary eo amin’ny lafiny ara-panahy raha miziriziry hahazo fientanam-po isika, sy hiakatra amin’ny elatra, dia hiafara amin’ny fandravana ny maha-ara-panahy izany.

Tsy miankina amin’ny toerana iray ny zava-misy momba ny fanatrehan’Andriamanitra, fa miankina fotsiny amin’ny fanapahan-kevitra hametraka ny Tompo eo anoloantsika mandrakariva. Miseho ny olantsika rehefa mandà tsy hametraka ny fitokiana amin’ny zava-misy momba ny fanatrehany isika. Ho antsika ilay fanandramana resahin’ny mpanao salamo — "Koa tsy hatahotra isika, na dia . . ." rehefa miorina amin’ny Zava-misy isika, tsy amin’ny fahatsiarovan-tena momba ny fanatrehan’Andriamanitra fa amin’ny zava-misy momba izany — Indro, teto hatramin’izay rehetra izay Izy!

Amin’ny fotoana manan-danja dia ilaina ny mangataka fitarihana, nefa tokony tsy hilaina ny hilaza foana hoe — "Tompo ô, tariho aho eto, sy erỳ." Mazava ho azy fa hitarika Izy! Raha tsy araka ny baikony ny fanapahan-kevitra raisintsika araka ny saina mahazatra, dia hamakivaky azy ireny an-keriny Izy ka hisakana antsika; amin’izay isika dia tsy maintsy mangina sy miandry ny fitarihan’ny fanatrehany.