NY FITSAPANA NY TOMBONTSOAN’NY TENA
“Raha maka ny havia ianao, dia handeha any amin’ny havanana aho; fa raha mankany amin’ny havanana ianao, dia handeha any amin’ny havia aho.”
Genesisy 13:9
Raha vao manomboka miaina ny fiainam-pinoana an’Andriamanitra ianao, dia hisokatra eo anoloanao ireo zavatra azo antenaina mahavariana sy mirenty, ary anao ara-drariny ireo zavatra ireo; kanefa raha miaina ny fiainam-pinoana ianao dia hampiasa ny zonao handà ny zonao ianao, ka hamela an’Andriamanitra hifidy ho anao. Indraindray avelan’Andriamanitra hiditra ao amin’ny toerana fizahan-toetra ianao izay tokony hiheverana ny hahasoa anao ho zavatra marina sy mety raha tsy niaina fiainam-pinoana ianao; fa raha miaina izany ianao, dia handà amim-pifaliana ny zonao ka hamela an’Andriamanitra hifidy ho anao. Izany no fampiofanana izay anovan’ny fankatoavana ny feon’Andriamanitra ny voajanahary ho ara-panahy.
Isaky ny atao ho mpitari-dalana eo amin’ny fiainana izay marina, dia hanadonto ny fahitana lalina ara-panahy izany. Tsy ny fahotana no fahavalo lehiben’ny fiainam-pinoana an’Andriamanitra, fa ny tsara izay mbola tsy ampy hatsarana. Ny tsara no fahavalon’ny tsara indrindra mandrakariva. Toa ny fifidianan’i Abrahama no zavatra feno fahendrena indrindra eto an-tany, zony izany, ary ireo olona manodidina azy dia hihevitra azy ho adala raha tsy mifidy izy. Maro amintsika no tsy mandroso ara-panahy satria aleontsika mifidy izay marina toy izay miantehitra amin’Andriamanitra hifidy ho antsika. Tsy maintsy mianatra mandeha araka ilay fenitra izay mampifantoka ny masony amin’Andriamanitra isika. "Mandehana eo anatrehako."