RAISO NY FANAPAHAN-KEVITRA HANOMBOKA
“Ampio fahatsaran-toetra ny finoanareo. . ." ("Omeo fahatapahan-kevitra ny finoanareo.") (MOFFATT.)”
2Petera 1:5
Ny hoe "Ampio" dia midika fa misy zavatra tsy maintsy ataontsika. Atahorana hohadinointsika fa tsy afaka manao izay ataon’Andriamanitra isika, ary tsy hanao izay azontsika atao Andriamanitra. Tsy afaka mamonjy na manamasina ny tenantsika isika, Andriamanitra no manao izany; kanefa tsy hanome antsika fahazarana tsara Andriamanitra, tsy hanome antsika toetra Izy, tsy hampandeha antsika amin’ny lalana marina Izy. Isika ihany no tsy maintsy manao izany rehetra izany, tsy maintsy tanterahintsika etỳ ivelany ny famonjena izay tanterahin’Andriamanitra ao anatintsika. Ny hoe "Ampio" dia midika hoe mizatra manao zavatra, ary sarotra izany amin’ireo dingana voalohany. Ny mandray fanapahan-kevitra hanomboka dia ny manao fiandohana, dia ny mampianatra ny tenanao amin’ny lalana tokony halehanao.
Mitandrema amin’ny fironana hanontany ny lalana rehefa fantatrao tsara izany. Raiso ny fanapahan-kevitra hanomboka, atsaharo ny fisalasalana, ary ataovy ny dingana voalohany. Aoka ho tapa-kevitra rehefa miteny Andriamanitra, tanteraho amim-pinoana avy hatrany izay lazainy, ary aza ovana intsony mihitsy ny fanapahan-kevitrao. Raha misalasala ianao rehefa milaza aminao Andriamanitra mba hanao zavatra iray, dia ataonao tandindomin-doza ny toeranao ao amin’ny fahasoavana. Raiso ny fanapahan-kevitra hanomboka, raiso samirery izany, ataovy amin’ny sitraponao izao ilay dingana, ataovy tsy ho azo atao ny miverina. Dory ireo tetezana ao ivohonao — "Hanoratra izany taratasy izany aho"; "Handoa izany trosa izany aho." Ataovy tsy azo ihodivirana ilay zavatra.
Tsy maintsy mizatra mihaino sy mankatò an’Andriamanitra momba ny zavatra rehetra isika, mba hanana fahazarana hamantatra izay lazain’Andriamanitra. Raha tonga ny fotoan-tsarotra, ka mitodika ho azy avy hatrany amin’Andriamanitra isika, dia fantatsika fa efa niforona ilay fahazarana. Tsy maintsy mandray fanapahan-kevitra hanomboka eo amin’izay misy antsika, fa tsy eo amin’izay tsy misy antsika.