NY ANJARA NOTENDRENA HO AZY AMIN’NY FITSANGANANA AMIN’NY MATY

Ny Hazofijalian’ny Tompontsika no vavahady hidirana ao amin’ny fiainany: ny Fitsanganany amin’ny maty dia midika fa manana hery hampita ny fiainany amiko Izy ankehitriny. Rehefa ateraka indray avy any ambony aho, dia raisiko avy amin’ny Tompo Nitsangana tamin’ny maty ny tena fiainany.

Ny anjara notendrena ho an’ny Tompontsika amin’ny Fitsanganany amin’ny maty dia ny hitondra "zanaka maro ho amin’ny voninahitra." Ny fanatanterahana ny anjara notendrena ho Azy no manome Azy zo hanao antsika ho zanak’Andriamanitra lahy sy vavy. Tsy ao amin’ny fifandraisana amin’Andriamanitra izay misy ny Zanak’Andriamanitra mihitsy isika; fa entin’ny Zanaka ho ao amin’ny fifandraisan’ny maha-zanaka. Rehefa nitsangana tamin’ny maty ny Tompontsika, dia nitsangana ho amin’ny fiainana vaovao tanteraka Izy, ho amin’ny fiainana izay tsy niainany talohan’ny nahatongavany ho nofo. Nitsangana ho amin’ny fiainana izay mbola tsy nisy hatrizay Izy; ary ny fitsanganany amin’ny maty dia midika ho antsika fa atsangana ho amin’ny fiainany nitsangana isika, fa tsy ho amin’ny fiainantsika taloha. Indray andro any dia hanana vatana tahaka ny vatany be voninahitra isika, nefa afaka mahafantatra ankehitriny ny hery mahavokatry ny fitsanganany amin’ny maty ary mandeha amin’ny fiainam-baovao. "Tiako ny hahalala Azy ao amin’ny herin’ny fitsanganany amin’ny maty."

"Tahaka ny nanomezanao Azy fahefana amin’ny nofo rehetra, mba homeny fiainana mandrakizay izay rehetra nomenao Azy." "Fanahy Masina" no anarana araka ny zavatra niainana iantsoana ny Fiainana Mandrakizay miasa ao amin’ny olombelona eto sy ankehitriny. Ny Fanahy Masina no maha-Andriamanitra ao amin’ny hery mivoaka Izay mampihatra ny asa fampihavanana amin’ny zavatra iainantsika. Isaory Andriamanitra fa marina amim-boninahitra sy amim-piandrianana ny ahafahan’ny Fanahy Masina manatanteraka ao anatintsika ny tena toetra voajanaharin’i Jesosy raha mankatò Azy isika.