KOM AAN DIE GANG

U het die Goddelike natuur geërf, sê Petrus (vers. 4), skroef nou u aandag vas en vorm gewoontes, lê ywer aan die dag, konsentreer. "Voeg by" beteken alles wat karakter beteken. Geen mens word natuurlik of bonatuurlik met karakter gebore nie, hy moet karakter maak. Ons word ook nie met gewoontes gebore nie; ons moet gewoontes vorm op die grondslag van die nuwe lewe wat God in ons geplaas het. Ons is nie bedoel om verligte weergawes te wees nie, maar die gewone materiaal van die alledaagse lewe wat die wonder van die genade van God vertoon. Sleurwerk is die toetssteen van karakter. Die groot hindernis in die geestelike lewe is dat ons groot dinge wil soek om te doen. "Jesus het 'n handdoek geneem . . . en die dissipels se voete begin was."

Daar is tye wanneer daar geen verligting en geen verrukking is nie, maar net die daaglikse kringloop, die gewone taak. Roetine is God se manier om ons tussen ons tye van inspirasie te red. Moenie verwag dat God altyd Sy verrukkende minute aan u sal gee nie, maar leer om deur die krag van God in die gebied van sleurwerk te leef.

Dit is die "byvoeg" wat moeilik is. Ons sê dat ons nie verwag dat God ons op blombeddings van gemak hemel toe moet dra nie, en tog tree ons op asof ons dit wel verwag! Die kleinste besonderheid waarin ek gehoorsaam het al die almagtige krag van die genade van God daaragter. As ek my plig doen, nie ter wille van plig nie, maar omdat ek glo dat God my omstandighede konstrueer, dan is die hele voortreflike genade van God juis op die punt van my gehoorsaamheid myne deur die Versoening.