IGUNYA NOKUZIMELA

INkosi yethu ayikuphoqeleli nakanye ukulalela; isitshela ngokugcizelela kakhulu lokho okufanele sikwenze, kodwa ayilokothi isebenzise izindlela zokusenza sikwenze. Kumelwe simlalele ngenxa yobunye bomoya. Yingakho noma nini lapho iNkosi yethu yayikhuluma ngobufundi, yayiqala ngokuthi UMA — akudingeki ukuba ube ngumfundi ngaphandle kokuba uthanda. "Uma umuntu efuna ukuba ngumfundi waMi, makazidele," makanikele Kimi ilungelo lakhe lokuzibusa. INkosi yethu ayikhulumi ngezikhundla zaphakade, kodwa ngokuba wusizo kuYe kulolu hlelo lwezinto, yingakho izwakala iqine kangaka (qh. NgokukaLuka 14:26). Ungalokothi uhumushe la mazwi ngaphandle kwaLowo owawashoyo.

INkosi ayinginiki imithetho, yenza indinganiso yaKhe icace kakhulu, futhi uma ubudlelwane bami naYe bungobothando, ngiyokwenza ekushoyo ngaphandle kokunqikaza. Uma nginqikaza, kungenxa yokuthi ngithanda omunye oqhudelana naYe, okungukuthi, mina uqobo. UJesu Kristu ngeke angisize ukuba ngimlalele, kumelwe ngimlalele; futhi lapho ngimlalela, ngifeza isiphetho sami esingokomoya. Ukuphila kwami siqu kungase kugcwale izehlakalo ezincane nezingasho lutho, ezingabonakali nhlobo futhi eziphansi; kodwa uma ngilalela uJesu Kristu ezimweni ezivele zingahleliwe, ziba yizimbotshana ezincane engibona ngazo ubuso bukaNkulunkulu, futhi lapho ngimi ubuso nobuso noNkulunkulu ngiyothola ukuthi ngokulalela kwami izinkulungwane zabusiswa. Uma ukuhlenga kukaNkulunkulu sekufinyelele eqophelweni lokulalela emphefumulweni womuntu, kuhlale kudala. Uma ngilalela uJesu Kristu, ukuhlenga kukaNkulunkulu kuyongena ngamandla ngami ekuphileni kwabanye, ngoba ngemva kwesenzo sokulalela kukhona ubuqiniso bukaNkulunkulu uMninimandla onke.