UMBONO NEQINISO
“Ababizelwe ukuba ngabangcwele.”
1 KwabaseKhorinte 1:2
Bonga uNkulunkulu ngokuboniswa konke ongakabi yikho. Ube nombono, kodwa awukafiki lapho neze. Kusesigodini, lapho sivivinywa khona ukuthi sizoba ngabakhethiweyo yini, lapho iningi lethu libuyela emuva. Asikakulungeli ngokugcwele ukushaywa okumelwe kufike uma sizoguqulwa sibe sesimweni sombono. Sibonile lokho esingeyikho, nalokho uNkulunkulu afuna sibe yikho, kodwa ingabe sizimisele ukuba umbono "ushaywe uze ube sesimweni futhi ulungele ukusetshenziswa" nguNkulunkulu? Lokhu kushaywa kuhlala kuza ngezindlela ezivamile nangabantu abavamile.
Kunezikhathi lapho sazi khona ukuthi iyini injongo kaNkulunkulu; ukuthi siyovumela yini umbono ukuba uguqulwe ube yisimilo sangempela kuncike kithi, hhayi kuNkulunkulu. Uma sikhetha ukuvilapha entabeni futhi siphile enkumbulweni yombono, ngeke sibe lusizo ngempela ezintweni ezivamile ezakha ukuphila komuntu. Kumelwe sifunde ukuphila ngokwethembela kulokho esikubone embonweni, hhayi ekuthathekeni nasekuzindleni ngoNkulunkulu ngokuqaphela, kodwa siphile ngezinto ezingokoqobo ekukhanyeni kombono size sifinyelele eqinisweni langempela. Yonke ingxenye yokuqeqeshwa kwethu ibheke kuleyo ndlela. Funda ukubonga uNkulunkulu ngokusazisa izimfuno zaKhe.
Lowo "nginguye" omncane uhlale equmbile lapho uNkulunkulu ethi yenza. Lowo "nginguye" omncane makashwabane entukuthelweni kaNkulunkulu — "NGINGUYE ENGINGUYE ukuthumile." Kumelwe abuse. Akukuthinti ngokujulile yini ukuqaphela ukuthi uNkulunkulu uyazi lapho sihlala khona, nezindlwana zezinja esikhasa singene kuzo! Uyosizingela njengokubaneka kombani. Akekho umuntu owazi abantu njengoNkulunkulu.