NJALO MANJE
“Thina . . . siyanincenga ukuba ningawamukeli ngeze umusa kaNkulunkulu.”
2 KwabaseKhorinte 6:1
Umusa obunawo izolo ngeke ulungele namuhla. Umusa wukuthandwa nguNkulunkulu okuchichimayo; ungahlale ubala ukuthi ukhona ukuze ukusebenzise. "Ngokubekezela okukhulu, ezinhluphekweni, ezidingweni, nasekucindezelekeni" — yilapho kufika khona isivivinyo sokubekezela. Ingabe uyawuyeka umusa kaNkulunkulu lapho? Ingabe uthi — Hhawu, kodwa, ngeke ngibale lesi sikhathi? Akuyona indaba yokuthandaza nokucela uNkulunkulu akusize; kungukuthatha umusa kaNkulunkulu manje. Senza umthandazo ube ukulungiselela umsebenzi, awukaze ube yilokho eBhayibhelini. Umthandazo ungumsebenzi wokuziqeqesha wokusebenzisa umusa kaNkulunkulu. Ungathi — Ngizokukhuthazelela lokhu kuze kube yilapho ngikwazi ukuhamba ngiyothandaza. Thandaza manje; sebenzisa umusa kaNkulunkulu ngesikhathi sesidingo. Umthandazo uyinto ephathekayo kunazo zonke, awukona ukusabela nje kokuzinikela. Umthandazo uyinto yokugcina lapho sifunda khona ukusebenzisa umusa kaNkulunkulu.
"Ekushayweni, ekuboshweni, ezinxushunxushwini, emisebenzini ekhandlayo" — kuzo zonke lezi zinto bonakalisa ukusebenzisa umusa kaNkulunkulu okuyokwenza ube yisimangaliso kuwe nakwabanye. Wusebenzise manje, hhayi kamuva. Izwi elilodwa olimini lomoya lithi Manje. Vumela izimo zikuyise lapho zithanda khona, qhubeka usebenzisa umusa kaNkulunkulu kunoma yisiphi isimo ongase ube kuso. Obunye bobufakazi obukhulu kakhulu bokuthi usebenzisa umusa kaNkulunkulu ukuthi ungathotshiswa ungabonakalisi ngisho nomkhondo omncane wanoma yini ngaphandle komusa waKhe.
"Ningenalutho . . ." Ungalokothi ugodle noma yini. Thulula okuhle kunakho konke onakho, uhlale umpofu. Ungalokothi usebenzise ubuciko noma uqaphe ngokweqile ngengcebo uNkulunkulu ayinikezayo. Lobu ngubumpofu obunqobayo.