UMBUZO OTHUSAYO
“Ndodana yomuntu, angaphila yini la mathambo?”
UHezekeli 37:3
Ingabe leso soni singaguqulwa sibe ngongcwele? Ingabe lokho kuphila okusontekile kungalungiswa? Kunempendulo eyodwa kuphela: "Nkosi, Wena uyazi, mina angazi." Ungalokothi ungene ngenkani ngengqondo ephusile yenkolo uthi — "Hhawu, yebo, ngokufunda iBhayibheli kancane ngokwengeziwe nangokuzinikela nangomthandazo, ngiyayibona indlela okungenziwa ngayo."
Kulula kakhulu ukwenza okuthile kunokuthembela kuNkulunkulu; senza iphutha lokubheka ukwethuka njengogqozi. Yingakho zimbalwa kangaka izisebenzi ezikanye noNkulunkulu kodwa ziningi kangaka izisebenzi ezimsebenzelayo. Singakhetha kakhulu ukusebenzela uNkulunkulu kunokukholwa kuYe. Ingabe ngiqiniseke ngokuphelele ukuthi uNkulunkulu uyokwenza lokho engingenakukwenza? Ngiphelelwa yithemba ngabantu ngezinga engingakaze ngiqaphele ngalo ukuthi uNkulunkulu ungenzele okuthile. Ingabe okuhlangenwe nakho kwami kuwukuqaphela okumangalisa kangaka amandla nobukhulu bukaNkulunkulu kangangokuba ngingalokothi ngiphelelwe yithemba nganoma ubani engimbonayo? Ingabe ukhona nhlobo umsebenzi womoya owenziwe kimi? Izinga lokwethuka liyizinga lokuntuleka kokuhlangenwe nakho komoya komuntu siqu.
"Bhekani, bantu bami, ngiyovula amathuna enu." Lapho uNkulunkulu efuna ukukubonisa ukuthi imvelo yomuntu injani ngaphandle kwaKhe, kumelwe akubonise yona kuwe uqobo. Uma uMoya kaNkulunkulu ukunike umbono walokho oyikho ngaphandle komusa kaNkulunkulu (futhi uNkulunkulu ukwenza lokhu kuphela lapho uMoya waKhe esebenza), uyazi ukuthi asikho isigebengu esibi ngokoqobo ngisho nangengxenye yalokho ozazi ukuthi wena ungaba yikho. "Ithuna" lami livulwe nguNkulunkulu futhi "ngiyazi ukuthi kimi (okungukuthi, enyameni yami) akuhlali lutho oluhle." UMoya kaNkulunkulu uqhubeka wembula ukuthi imvelo yomuntu injani ngaphandle komusa waKhe.