UKUKHONZA
“Wamisa itende lakhe iBethele lingasentshonalanga ne-Ayi lingasempumalanga: lapho wakha i-altare.”
IGenesisi 12:8
Ukukhonza kungukunika uNkulunkulu okuhle kakhulu akunike kona. Qaphela ukuthi wenzani ngokuhle kakhulu onakho. Noma nini lapho uthola isibusiso kuNkulunkulu, sibuyisele kuYe njengesipho sothando. Zinike isikhathi sokuzindla phambi kukaNkulunkulu futhi unikele isibusiso sibuyele kuYe ngesenzo samabomu sokukhonza. Uma uziqongelelela into, iyophenduka ukubola okomile okungokomoya, njengemana lapho liqongelelwa. UNkulunkulu akasoze akuvumela ukuba uzigcinele into yomoya, kumelwe ibuyiselwe kuYe ukuze ayenze isibusiso kwabanye.
IBethele liwuphawu lwenhlanganyelo noNkulunkulu; i-Ayi liwuphawu lomhlaba. U-Abrahama wamisa itende lakhe phakathi kwalezi zindawo zombili. Isilinganiso sokubaluleka komsebenzi wethu wasobala esiwenzela uNkulunkulu yinhlanganyelo ejulile yangasese esinayo naYe. Ukujaha kuhlale kungalungile, sihlala sinesikhathi esiningi sokukhonza uNkulunkulu. Izinsuku ezinokuthula noNkulunkulu zingaba ugibe. Kumelwe simise amatende ethu lapho siyohlala sinezikhathi ezinokuthula noNkulunkulu, kungakhathaliseki ukuthi izikhathi zethu nomhlaba zinomsindo kangakanani. Azikho izigaba ezintathu ekuphileni komoya — ukukhonza, ukulinda nokusebenza. Abanye bethu bahamba ngokugxuma njengamaxoxo omoya, sigxuma sisuka ekukhonzeni siye ekulindeni, nasekulindeni siye emsebenzini. Umqondo kaNkulunkulu uwukuba zontathu zihambe ndawonye. Zazihlala zihlangene ekuphileni kweNkosi yethu. Wayengajahi futhi engaphumuli. Kuyisiyalo, asinakungena kuso konke ngesikhathi esisodwa.